أضحي مبارك
كل سنه بتمر علينا بيسعدني أوى اللي بشوفه صباح كل عيد من الأعياد سواء عيد الفطر أو عيد الأضحي المباركين
صلاه العيد
يااااااه منظر جميل أوي بيملاني طاقه علي الصبحيه كده لأني بصراحه كده كل ما أشوف الأعداد الهائله اللي بتقوم في الصبح في الجو البارد أوى ده وكل واحد أو واحده بيجروا علشان يلحقوا يحجزوا مكان في الخلاء بصراحه بحس بالعيد بجد
إحساس جميل أنا متأكد إنكم كلكم بتحسوا بيه بس بصراحه الأجمل من المنضظر ده هو منظر تجهيز الخلاء
شباب زي الورد ربنا يبارك فيهم ويكرمهم وبجد الدعوه دى من كل قلبي سهرانين طول الليل علشان ينضفوا أرض الخلاء ويجهزوها للمصلين اللي جايين الصبح من كل مكان
مجهود بجد مش قادر أوصفه
كنت ومازلت بتمني إني أشاركهم في تجهيز الخلاء بس بيمنعني أسباب كتير أوى أنا شايف من وجهه نظرى إني صح وإني من الأفضل إني أكون بعيد وما أنضمش للمجموعه دي مع إنهم مجموعه كويسه جدآ والله بس هنعمل إيه بئى
( عايزين نمشى جنب الحيطه ونقولها يا حيطه دارينا)
ومش لوحدى اللي بقول كده وكمان مش لوحدى اللي بتمني إني أساعدهم بس مش قادر أقرب منهم كتير أوي غيري بس أهو كلهم برضه بيقولوا كده
مش خوف والله بس ظروفي الشخصيه تمنعني إني أغيب عن شغلي وأهلي فترات طويله من غير ما يعرفوا أنا فين ولا ليه كل الحكايه إني هكون زى الشباب دول
طبعآ فيه ناس فيكم فاهمه بتكلم علي إيه وأكيد فيه ناس كتيره مش فاهمه أنا بتكلم علي إيه بس ممكن تفهموا لما أوصفلكم صلاه العيد اللي بشوفها واللي كلكم بتشوفها بتكون عامله إزاي
صلاه العيدين عندنا زي ما سبق ووصفت شىء جميل بجد
شىء يفرح ويشرح القلب والله يا جماعه
أعداد مهوله نساء ورجال وشباب وأطفال كلهم جايين علشان يحسوا إن فيه عيد
بجد أصل أنا مش بحس إن فيه عيد وبالذات اليومين دول ( بعد ما كبرت يعني ) إلا لما أصلي العيد في الخلاء وأشوف المنظر الجميل ده
بس الشىء الوحيد بئى اللي بيغيظني في صلاه العيدين هو الشرطه
طب ليه الشرطه بتغظني ؟
علشان الناس كلها بتكون بتصلي والشرطه واقفين ولا كأنهم مننا
بزعل أوووووووووووي
أعداد ضخمه من رجال الشرطه محاوطين المكان ومش بيصلوا زينا
طيب ليه ؟
علشان إيه ؟؟
كلنا عارفين هما موجودين ليه ؟
موجودين علشان لو لا قدر الله حصل شغب أو إذا لا قدر الله إستغلت أى جماعه محظوره التجمع الضخم ده للإستفاده منه لصالحهم أوكى إنتوا صح وأنا طبعآ ماليش وكمان ما أقدرش أقول إذا كان وجودكم صح أو غلط لأنكم إنتوا حماه الشعب مش أنا لكن السؤال الوحيد ليا ليه رجال الشرطه اللي بيحضروا صلاه العيدين مش بيصلوا صلاه العيدين ؟؟؟
سؤال مش لاقي له إجابه أو لاقيها بس مش عجباني
ممكن برضه
بعد المنظر الجميل ده والصبحيه الأكثر من رائعه اللي بمر بيها كل عيد بييجي الدور علي شىء أجمل وأجمل بالنسبه ليا
الضحيه
ياااااااااااه بحس بإحساس جميل أوى وأنا وعمى وإبن عمي بندبح الصحيه وبنجهزها ونقطعها ونوزن ونلف اللحمه ولما أروح أوزع علي الأهل والجيران والأصحاب والناس الغلابه
ياااااااااااااااااااااااه جميله أوى دعوه ست غلبانه بتربي عيال يتامه وهيه بتدعيلي من قلبها
صدقوني يا جماعه بدمع
بدمع وأنا طاير من الفرحه وبيبقي نفسى أصرخ وأقولها إدعي كماااااااااااااااان بس بخاف تفهمني غلط وتفتكر إني بتريق عليها علشان هيه غلبانه وكده
بفرح أوى من جوايا وأمشى وأنا طاير من الفرح
بجد ومن قلبي بقولكم يا جماعه اللي ما جربش الإحساس الجميل ده يجرب وصدقوني هتدعولي ومن قلبكم
اليوم ده بحس فيه بحاجات جميله أوي ما بحسش بيها طول السنه
ييجي بعد كده بئى زياره الأهل والأقارب والأصحاب
صله الرحم يا جماعه بجد يوم مهما حاولت أوصف ببقي فرحان فيه أد إيه مش هتصدقوني بس بجد يوم جميل أووووووووووى من أجمل الأيام اللي بتمر عليا طول السنه
عارفين
بجد أيام العيدين دول اليومين الوحيدين اللي بشوف فيها تجمعات من الأهالي مش برضه إنتوا كمان ملاحظين كده ؟؟
الدنيا بتاخد الناس طول السنه وتيجي في اليومين دول تمشى في الشارع تفرح كده لما تقابل مجموعات وراها مجموعات من البشر كل مجموعه من عيله واحده
ما بنشوفش المنظر ده نهائى غير في اليومين دول
يارب
اللهم يا أرحم الراحمين إجمعنا دائمآ علي خير ولا تفرقنا
بجد يوم المفروض العالم كله يحتفل بيه مش بس المسلمين
بقولكم إيه
أنا حاسس إنكم زهقتم مني
يالا أسيبكم شويه بئى و
عمار يا مصر
Post a Comment