عارفين يا جماعه عداد المياه اللي بيركب في كل بيت وكل شقه ده ؟؟
طبعآ عارفينه إيه ياعم السؤال العبيط اللي بتسأله ده بئى ؟
بالراحه عليا شويه إقروا الحكايه الظريفه دي معايا
من حوالي عشرين يوم رحت أقدم علي عداد مياه أصلي عقبال عندكم كده بتجوز اليومين دول وأهي هانت وإن شاء الله خلال فتره صغيره أوى هرتاح من تجهيز البيت وهبئى أعزمكم علي الفرح إن شاء الله
المهم
رحت يا جماعه أقدم علي العداد قالولي روح الوحده المحليه قدم طلب هناك قلت سهله
رحت الوحده قالولي إشتري دوسيه
أوكي
إشتريت الدوسيه ورحت قدمته الموظف طلع معرفه والحمد لله خلصهولي بسرعه
روح إختمه في المكتب الفلاني
رحت ختمته ورجعت لما رجعت قاللي روح بئى المكتب الفلاني إختمه قلت ماشي ورحت ختمته ورجعتله
إطمن علي الختمين وقاللي روح بئى الخزنه إدفع
رحت الخزنه ودفعت شويه رسوم صغيره كده وبعد ما دفعتها رجعتله تاني
إطمن علي الدوسيه والأوراق والأختمام ووصل الخزينه وقاللي روح بئى يا معلم صورلي عقد البيت نسختين ... رحت صورتله العقد ورجعت أخد نسخه وإداني نسخه وقاللي روح بئى هيئه المياه وقدم الطلب هناك ... فين الهيئه دي ياعم الحاج ... وصفهالي ويشكر طبعآ
رحت الهيئه علشان أقدم الطلب والحمد لله طلع الموظف المختص معرفه وربنا سهلي المشوار ... قاللي عايزين تمن العداد
كام يا سيدي قال ميه وتسعين جنيه طبعآ دفعتهم وقلت كده إشطه إيه الهنا ه العداد بميه وتسعين جنيه بس ؟؟
بعد ما دفعت تمن العداد وخلصت قاللي تيجي بكره بئى يا معلم علشان تدفع رسوم المقايسه وأجور العمال قلت ماشى
رحت تاني يوم قاللي عايزين ميه وتمنين جنيه قلت ماشى ودفعتهم طبعآ
( ماهو بيني وبينكم مزنووووق ومضطر أدفع )
المهم
قاللي تعدي علينا بكره إن شاء الله قلت يااااااه معقوله العداد هييجي بالسهوله دى ؟
ماكنتش مصدق نفسى لأني كنت محتاج العداد جدآ علشان كل التجهيز في الشقه واقف علي العاد
السباكه والسيراميك ووراهم هم تقيل طبعآ زيت ومش عارف إيه
المهم
رحت تاني يوم قالولي ياسيدي المقايسه بتاعه حضرتك كبيره شويه كملنا رسوم المقايسه وأجور العمال لـ ثلثمائه جنيه
دفعتهم وأنا بجز علي سناني
لكن بما إني كنت مش طايق نفسى علشان المصاريف الكبيره اللي لقيت نفسى بصرفها في الفتره دي سألته طبعآ ليه الفلوس دي كلها ؟؟
قاللي مش فيه مواسير وعداد وعمال هيفحتوا ويركبوا وإشى محبس وجلب وكيعان ومش عارف إيه وهم تقيل قلتلهم ماشى
وكل يومين كده أروح أسأل فين العداد ؟؟
يقولوا ربنا يسهل يمكن بكره أو بعده أصل المخازن مافيشها عدادات
:(
ماشى يا أسادنا
لغايه من يومين كده ربنا سهل ولقيتهم فجأه بعد عشرين يوم بيقولولي العداد وصل
طب هو فين يا جماعه ؟
قالولي هو إنتا ركبت الوصله ؟؟
وصله إيه يا جماعه مش فاهم ؟؟
الوصله اللى من الشارع يا سيدي
يعني إيه ؟؟
يعني المواسير بتاعتك وكده
قلتلهم مش أنا دفعت تمن المواسير والوسله والعداد وكمان أجور العمال ؟
قالوا دي حاجه ودي حاجه
حضرتك تروح تركب المواسير بتاعتك والوصله وتيجي ياباشا الصبح الساعه ثمانيه تستلم العداد وهييجي معاك الباشمهندس علشان يركبه
ولو جه مالقاش الوصله متركبه هيرجع ومعاه العداد وهنرجع العداد تاني
وحلني بئى على ما العداد يجيلك تاني
:)
رحت شفت حد علشان يشوف الوصله دي
قاللي عنيا هجيلك يا سيدي بس تجهزلي الطلبات دي وهاجي يوم ما هتروح تجيب العداد وهفحر بس مش هركب حاجه غير لما المهندس يكون موجود طب هتكلف كام يا سيدي ؟؟
كتبلي طلبات بحوالي ثلثمائه جنيه دا غير شغل إيده
وعلشان خاطري هياخد ستين جنيه بس
سبحان الله
دفعت تمن الوصله والأجور مرتين
إيه رأيكم بئى ؟؟؟
مش برضه نقول عمار يا مصر ؟؟
ماهو شوف ان ماهو لازم يحصل كدة علشان تتاكد انك فى مصر لانة لو مش حصل كدة اعرف على طول انك وانت نايم انتقلت لبلد تانية هههههه
بجد يا جوجو الكومنت بتاعك موتني علي نفسى من الضحك
ميرسي علي الزياره والتعليق الجميل ده
وبصراحه عندك حق هو فعلآ لازم نتعب شويه علشان نحب البلد دي أكتر وأكتر